Um Mëttwoch géint 17.15 Auer ass d'Gefier an de Rampli geroden a getippt. Dobäi gouf de Mann hannerem Steier ageklemmt a schwéier blesséiert. Firwat et zum Accident komm ass, ass nach net gewosst. De Centre d'intervention vun Iechternach war mat hydrauleschem Geschir am Asaz, fir de Chauffer ze befreien. Dee koum an d'Spidol. D'Streck Konsdref-Chrëschtnech huet musse gespaart ginn. Am Asaz waren d'Konsdrefer Pompjeeën, d'Ambulanz vun Iechternach, de Samu vun Ettelbréck an d'Air Rescue.